Sunday Igboho house fire in Oyo state – See how e happun

Sunday Igboho house fire in Oyo state – See how e happun

Sunday Igboho and e house wey burn
Yoruba activist from Oyo state, south west Nigeria Sunday Adeyemo, wey pipo sabi as Sunday Igboho don react to di fire incident wey happun for one of im residence for Ibadan.
E tell tori pipo say di house di pipo wey e no know burn down no be di one e dey live in for now.
E never clear who burn di house and why but tori be say na early mor-mor around 3:00am on Tuesday ‘unknown men’ bin burn di house.

How e happun?

One eyewitness wey dey live for di street of Sunday Igboho follow BBC tok say some pipo just come burn some part of di building.

E tok say di pipo wey come burn di house drive in with three vehicles

Investigate don also reveal say nobody die for di incident even as dem burn plenti valuables for di house.

Many of di pipo wey bin dey live for di house don pack comot from di house follow Oga Sunday go di new house wey im dey live.

Wen BBC Pidgin land for di residence, we see broken windows wia di jaguda pipo fit don pass take enta di building.

Some residence around di area say na wen power outage bin dey dem notice say fire begin burn for apartments.

Meanwhile police don begin investigate wetin happun.

Oyo State police confam say dem receive di report of fire incident for dia Sanyo Police Station say some unidentified hoodlums come Sunday Igboho house for SOKA area of Ibadan for inside one Hummer bus.

Dia statement say dem also receive report of di jaguda pipo wey dey shoot and set di house on fire.

Police say immediately di DPO Sanyo hear of di incident, e call Fire service and im also visit di scene to see wetin really happun.

Dem later put out di fire and dem don begin investigate those wey dey behind di attack.

Sunday Igboho house wey burn
All dis one dey happun afta Igboho bin give herdsmen seven days to leave di town afta im accuse dem say na dem dey behind di security palava for di town.
Sunday Ighoho quit notice to di herdsmen don cause tension for di Yoruba speaking state of Oyo, south-west Nigeria.
Violence bin happun for Igangan for Ibarapa North local goment area for Oyo State afta Sunday Igboho and im supporters storm di Fulani settlement.Dem burn down di house of Seriki Fulani, Salihu Abdukadir, during di clash.
Dis one wan happun even afta di Govnor Seyi Makinde bin warn pipo say im no go allow anybody to hide under say dem dey protect Yoruba interest to cause ethnic katata for di state.

Leave a Reply

Your email address will not be published. Required fields are marked *